စက်မှုလယ်ယာဦးစီးဌာန

စက်မှုလယ်ယာဦးစီးဌာန

(က)နောက်ခံသမိုင်းကြောင်း

          မြန်မာနိုင်ငံတွင် ၁၉၂၁ ခုနှစ်မှစတင်၍ စိုက်ပျိုးရေးဌာနလက်အောက်၌ စိုက်ပျိုးရေး အင်ဂျင်နီယာ ဌာနစိတ်တစ်ခုကို ဖွဲ့စည်းကာ သိပ္ပံထယ်၊ မျိုးစေ့ချကိရိယာ၊ ကောက်စိုက်ကိရိယာ နှင့် ရေစုပ်ပန့်ကဲ့သို့သော လယ်ယာသုံးစက်ကိရိယာများကို စတင်စမ်းသပ်သုံးစွဲ ဆောင်ရွက်ခဲ့ ကြ၏။

          ၁၉၄၉ ခုနှစ်တွင် လယ်ယာစိုက်ပျိုးရေးနှင့် သစ်တောဝန်ကြီးဌာနအောက်တွင် ထွန်စက်ယန္တရား တပ်ဆင် ရေးဘုတ်အဖွဲ့ကို ဖွဲ့စည်းပြီး စက်မှုလယ်ယာလုပ်ငန်းကို ဆောင်ရွက် ခဲ့သည်။ ၁၉၅၁ခုနှစ်တွင် ထွန်စက်ယန္တရား တပ်ဆင်ရေးဘုတ်အဖွဲ့အစား စိုက်ပျိုးရေး        အင်ဂျင်နီယာဌာနစိတ်ကို ဖွဲ့စည်းကာ သံကြိုးပတ် ထွန်စက်များဖြင့် မြေရိုင်းများ ဖော်ထုတ် ခြင်းနှင့် တောင်သူပိုင်လယ်မြေများကို အခကြေးငွေဖြင့် ထွန်ယက်ပေးခြင်း လုပ်ငန်းများကို ဆက်လက်ဆောင်ရွက်နိုင်ခဲ့သည်။ ယင်းသို့ ကြိုးစားဆောင်ရွက်ရင်း ၁၉၆၂ ခုနှစ် တော်လှန်ရေး ကောင်စီ အစိုးရ ကာလမတိုင်မီ စိုက်ပျိုးရေးဌာနခွဲတွင် ထွန်စက်(၁၆)မျိုး၊ အရေအတွက် (၅၁၄)စီးကို ဝယ်ယူဖြည့်တင်းနိုင် ခဲ့ပါသည်။

          ၁၉၆၂ ခုနှစ်၊ မတ်လ(၂)ရက်တွင် တော်လှန်ရေးကောင်စီအစိုးရတက်လာပြီး နိုင်ငံတော် အုပ်ချုပ်ရေး ယန္တရားကို စတင်တာဝန်ယူချိန်တွင် လယ်ယာစိုက်ပျိုးရေးနှင့် သစ်တောဝန်ကြီး ဌာနအောက်ရှိ မြေယာကျေး လက်ကြီးပွားတိုးတက်ရေးကော်ပိုရေးရှင်း (မြေ၊ ကျေး၊ ရှင်း)တွင် စက်မှုလယ်ယာစီမံကိန်းဌာနခွဲကို ဖွဲ့စည်းကာ လယ်ယာစက်မှုတပ်ဆင်ရေးကို အရှိန်အဟုန်ဖြင့် တည်ဆောက်နိုင်ရန် “စက်မှုလယ်ယာစီမံကိန်း" တစ်ရပ်ကို ရေးဆွဲချမှတ်ခဲ့ပြီး ၁၉၆၂ ခုနှစ် စက်တင်ဘာလတွင် စတင်အကောင်အထည်ဖော် ဆောင်ရွက် ခဲ့သည်။

          ၁၉၇၂ခုနှစ်၊ မတ်လ(၁၆) ရက်စွဲပါ တော်လှန်ရေးကောင်စီအစိုးရ၏ အမိန့်ကြော်ငြာ ချက်အမှတ်(၉၇)အရ လယ်ယာစိုက်ပျိုးရေးနှင့် သစ်တောဝန်ကြီးဌာန လက်အောက်ရှိ မြေယာကျေးလက်ကြီးပွား တိုးတက်ရေး ကော်ပိုရေးရှင်း (မြေ-ကျေး-ရှင်း)မှ စက်မှုလယ်ယာ စီမံကိန်းကို ခွဲထုတ်ကာ စက်မှုလယ်ယာဦးစီးဌာနအဖြစ် လုပ်ငန်းစီမံချက်များ ချမှတ်ကာ ပြန်လည်ဖွဲ့စည်းခဲ့သည်။

(ခ)ဌာနဖွဲ့စည်းပုံ

ဂ) ဌာနရည်မှန်းချက်

          စက်မှုလယ်ယာစနစ်သို့ ပြောင်းလဲကျင့်သုံးရေး

(ဃ) ဌာနမူဝါဒများ

          ၁။  တောင်သူလယ်သမားများ၏လိုအပ်ချက်များ၊ တွေ့ကြုံရသောအခက်အခဲများကိုသိရှိအောင်ကြိုးပမ်းဆောင်ရွက်ပြီးစက်မှုလယ်ယာဦးစီးဌာနမှ ကိုယ်စွမ်းဉာဏ်စွမ်းရှိသရွေ့ စိတ်ရင်းစေတနာမှန်ဖြင့် စေတနာထားကူညီဖြေရှင်းဆောင်ရွက်ပေးရန်။

          ၂။  နိုင်ငံတော်တွင် တောင်သူလယ်သမားများ၏ ယုံကြည်အားထားရာအဖွဲ့အစည်းတစ်ခုအဖြစ် ကြိုးပမ်းတည်ဆောက်ပြီးလယ်ယာကဏ္ဍဖွံ့ဖြိုးတိုးတက်ရေးအတွက် တောင်သူလယ်သမားများနှင့် တစ်သားတည်းပူးပေါင်းကာစက်မှုလယ်ယာကူးပြောင်းရေးအကောင်အထည်ဖော်ဆောင်ရွက်ရန်။

(င) ဌာနလုပ်ငန်းစဉ်များ

          ၁။  စက်မှုလယ်ယာလုပ်ငန်းများဖွံ့ဖြိုးတိုးတက်ရေးအတွက် ခေတ်မီအဆင့်မြင့် ပညာရေးနှင့် အသက်မွေး၀မ်းကျောင်းပညာရေးတို့တွင် အသိအမှတ်ပြုလက်မှတ်ရသင်တန်းများတည်ထောင်ဖွင့်လှစ်သင်ကြားနိုင်ရေးဆောင်ရွက်သွားမည်။

          ၂။  လယ်ယာသုံးစက်ကိရိယာများ၏ စံချိန်စံညွှန်းများသတ်မှတ်ဆောင်ရွက်ခြင်းလုပ်ငန်းများဖွံ့ဖြိုးတိုးတက်စေရန် အားပေးဆောင်ရွက်မည်။

          ၃။  စိုက်ပျိုးရေးလုပ်ငန်းတွင် အထူးသဖြင့် လုပ်ကွက်ငယ်တောင်သူလယ်သမားများအားဦးစားပေး၍ရေမြေဒေသသဘာဝနှင့်ကိုက်ညီသောလယ်ယာသုံးစက် ကိရိယာများကိုတွင်တွင်ကျယ်ကျယ်ထုတ်လုပ်သုံးစွဲနိုင်ရေးပံ့ပိုးရန်နှင့်  ခေတ်မီစက်မှုလယ်ယာစနစ်သို့ အဆင့်ဆင့် တိုးတက်ဖြစ်ပေါ်လာစေရန် အားပေးကူညီမည်။

(စ) ဌာနလုပ်ငန်းတာဝန်များ

          ၁။  လယ်ယာဝန်ဆောင်မှုလုပ်ငန်းများဖွံ့ဖြိုးတိုးတက်လာစေရန်။

          ၂။  ပုဂ္ဂလိကကဏ္ဍနှင့် သမဝါယမလုပ်ငန်းများတွင် လယ်ယာဝန်ဆောင်မှုလုပ်ငန်းများတိုးတက်ထွန်းကားလာစေရေးအတွက် သက်ဆိုင်ရာပုဂ္ဂလိကအဖွဲ့အစည်းများ၊ တောင်သူများနှင့် ပေါင်းစပ်ညှိနှိုင်းဆောင်ရွက်သွားရန်။

          ၃။  စက်မှုလယ်ယာစနစ်ကျင့်သုံးနိုင်သောလယ်ယာမြေ၊ စိုက်ပျိုးမြေနှင့် ကုန်းမြင့် လယ်ယာမြေများတိုးတက်ပေါ်ထွန်းလာစေရန်။

          ၄။  လယ်ယာလုပ်ငန်းခွင်တွင် လယ်ယာသုံးစက်ကိရိယာများတိုးတက်သုံးစွဲနိုင်ရေးကူညီပံ့ပိုးဆောင်ရွက်သွားရန်။

          ၅။  လယ်ယာသုံးစက်ကိရိယာပြင်ဆင်ရေးအလုပ်ရုံများကိုမြို့နယ်စက်မှုလယ်ယာစခန်းများတွင် တိုးချဲ့ဖွင့်လှစ်၍တောင်သူများလက်ဝယ်ရှိလယ်ယာသုံးစက်ကိရိယာများအားစနစ်တကျပြုပြင်ပေးနိုင်ရေးနှင့်လိုအပ်သောစက်အရန်ပစ္စည်းများကိုအလွယ်တကူဝယ်ယူရရှိနိုင်ရေးအတွက်ပုဂ္ဂလိကကဏ္ဍနှင့်ပေါင်းစပ်ညှိနှိုင်းဆောင်ရွက်သွားရန်။

          ၆။  စက်မှုလယ်ယာအသိပညာ၊ အတတ်ပညာများလေ့ကျင့်ပညာပေးသွားရန်နှင့် စက်မှုလယ်ယာသုတေသနလုပ်ငန်းများဖွံ့ဖြိုးတိုးတက်လာစေရေးကြိုးပမ်းဆောင်ရွက်သွားရန်။

(ဆ) Website >>> http://amd.moali.gov.mm

ဌာန Facebook Domain အမည်

          https://www.facebook.com/AMDadminho